Deyvafelagið heitir nú á Løgtingið um at játta felagnum minst 500.000 krónur aftur at næsta ár. Tey siga, at pengarnir skulu brúkast til at seta teknmálstulking til tíðindasendinganar hjá Kringvarpinum, Dag og Viku. Tey siga, at tað stendur illa til í so máta, og sum dømi nevna tey, at í oktober vórðu bert fimm Dagir og Viku sendingar teknmálstulkaðar - og tær vóru seinkaðar 1-3 dagar.

– Deyv hoyra ikki útvarp, og nógv deyv lesa eisini illa, tí er tað av størsta týdningi, at vit fáa Dag og Viku tulkaða, sigur Deyvafelagið.

Tey vísa á, at Kringvarpið hevur latið uppgávuna at tulka Dag og Viku til Teknmáls- og tulkatænastuna hjá Almannaverkinum. Men tey fáa ikki útvegað nøktandi tulking, tí tey hava vara hálvan annan tulk í starvi, umframt eitt skrivstovufólk upp á 3⁄4 tíð.

Á fundi við Mentamálaráðið og Kringvarpið herfyri varð ein ætlan løgd, har Deyvafelagið kundi roynt at yvirtikið arbeiðið at útvega tulk til Dag og Viku. Tað vil siga, at studio, sum fyrr hevur ligið í Almannaverkinum, verður flutt út í Deyvahúsið. Kringvarpið hevur áður upplýst, at trupulleikin er, at tað er so ringt at útvega deyvatulkar. Men Deyvafelagið sigur, at tey hava gott samstarv við allar tulkar, og tí halda vit at tað er eina roynd vert.

– Vit vilja ógvuliga fegin útvega hesa tænastu til limir okkara, men í løtuni hava vit ikki fíggjarliga orku at gera hetta arbeiðið. Vit hava ein dagligan leiðara í 70 prosent í starvi, umframt ein deyvaráðgevara, sum starvast 15 tímar um vikuna.

– Á einum fundi við Mentamálaráðið segði eitt embætsifólk, at Teknmálstulkatænastan fer at fáa 2,9 milliónir næsta ár – og tey hava framvegis bara hálvanannan tulk í starvi og eitt skrivvstovufólk í 3⁄4 starvi.

Í Deyvafelagnum samanbera tey seg við Sjóndepilin, sum fær 6,8 milliónir um árið í stuðli, og tey hava 10,5 fólk í starvi. Deyvafelagið hevur eina játtan upp á 982.000 krónur um árið.