Bæði føroyingaliðini í bestu hondbóltsdeildini hjá kvinnum í Íslandi vóru í leiki í dag.

Fyrr í dag vann liðið hjá Ingibjørg Olsen, ÍBV 27-25 á Fram á útivølli. Tað var annars Fram, ið var á odda 16-13 í steðginum. Í seinna hálvleiki lá munandi betri fyri hjá ÍBV, og var seinni hálvleikur vunnin 14-9.

Ingibjørg Olsen skoraði eitt mál fyri ÍBV í dag.

Natasja Hammer og liðfelagarnir í Haukum vunnu tvey týðandi stig í botnuppgerðini móti HK á heimavølli. Haukar vunnu sannførandi 35-27. Í fyrra hálvleiki leikaði tó javnt á. Í steðginum vóru Haukar bert á odda 16-15.

Natasja Hammer skoraði tvey mál fyri Haukar.

ÍBV er triðfremst í deildini við 10 stigum. Haukar eru triðaftast við fýra stigum.