Í dag boðar Vágs kommuna frá, at kampingplássið í Vági verður opið til hin 18. oktober, og síðan verður latið aftur fyri veturin.
Men, samstundis sum boðað verður frá hesum, verður víst á møguleikan at vitja í Vági við kampingvogni í heystfrítíðini.
- Í døgunum 9.-11. oktober og 13.-16. oktober verður stórt leikaland í Marghøllini í Vági - og í døgunum 8.-16. oktober verður tað tey rópa ljósfest í Vági.
Sagt verður, at ljósfestin verður í samband við, at 100 ár nú eru liðin, síðan Elverkið í Botni varð tikið í nýtslu.
Í Vágs kommunu leggja tey aftrat, at tað sostatt verður møguligt hjá fólki, sum eiga kampingvogn, at halda heystfrí á kampingplássinum í Vági.
