Higartil hevur karrieran hjá Dan Brimsvík, sum hevur verið B36 venjari síðani á heysti í 2020, verið eyðkend av, at tað ikki er eydnast at vinna ímóti teimum stóru, sum tað plagar at verða tikið til. Nú er hetta av álvara við at verða broytt. Í fyrsta umfari av landskappingini vann B36 3-0 í Gøtu, og í kvøld hevur B36 við 2-0 heimasigri varpað KÍ úr steypakappingini.

Í gjárkvøldið vann HB eftir longda leiktíð 2-1 ímóti Víkingi, og tað vil siga, at bæði Víkingur og KÍ, sum spældu steypafinalu í fjør, longu eru varpað úr 2023 steypakappingini.

Hannes Agnarsson varð skiftur inn beinanvegin eftir steðgin, og hann átti avgerandi leiklut í B36 sigrinum.

Hann legði úr høgru upp til 1-0 málið, tá ið hann smáar tíggju minuttir eftir steðgin sendi av baklinjuni og aftur til Andrass Johansen, sum stýrdi bóltin í handara síðunetið, og hann skoraði seks minuttir seinni og við hælinum 2-0 málið, tá ið Bjarki C. Nielsen í vinstru sneiddi framvið Heina Vatnsdal.

KÍ venjarin Megne Hoseth valdi at halda lyklaspælarunum Odmar Færø og toppskjúttanum Páll A. Klettskarð á beinkinum. Sivert Gussiås var ósjónligur miðframherji, inntil Óli Ey. Poulsen 10 minuttir undan leikloki loysti hann av. Tá ið ein tími var farin, og B36 akkurát hevði økt um munin til 2-0, vórðu Odmar Færø og Páll A. Klettskarð skiftir inn. B36 var síðsta hálva tíman nógv í verjustøðu, og KÍ var ofta í góðum støðum í B36 brotsteiginum. Mattias H. Lamhauge var sera stinnur millum B36 stólparnar, og liðfelagarnir ofraðu seg ferð eftir ferð, tá ið teir blokeraðu til horna og innkast.

Og so hevði B36 risastóran møguleika at økja um leiðsluna í skjótálopi, men innskifti Michal Przybylski valdi sjálvur at royna ímóti málinum heldur enn at spæla til innskifta Aron Knudsen, sum var púra leysur.

B36 - KÍ 2-0 (0-0)

1-0: Andrass Johansen

2-0: Hannes Agnarson

Dómari: Eiler Rasmussen