Liðið hjá Bjarna í Selvindi og Allani Norðberg, Valur, og liðið hjá Teis Horn Rasmussen, TTH Holstebro vóru fyri tapum í EHF European League í kvøld.
Á útivølli í Ungarn tapti Valur tepurt 28-29 fyri Tatabanya í innleiðandi bólki H. Í steðginum var Tatabanya á odda 14-12.
Bjarni skoraði fimm mál upp á átta málroyndir, og hann var triðbesti málskjúttin hjá Vali í kvøld.
Í sama bólki spælir liðið hjá Magnusi Árasyni, Mors-Thy í skrivandi stund dyst á útivølli móti slovenska liðnum, RD Slovan.
Vit venda aftur við tí dystinum og støðuni í bólkinum seinni í kvøld.
Í bólki F tapti liðið hjá Teis Horn Rasmussen, TTH Holstebro í Gråkjær Arena 27-31 fyri spanska liðnum, Torrelavega, ið var á odda 15-12 í steðginum.
Teis var effektivur. Hann skoraði fýra mál upp á fýra málroyndir.
Aftaná fýra dystir er Torrelavega fremst í bólkinum við átta stigum. TTH Holstebro hevur fýra stig.