– Hetta kann betra um lívið hjá fólki við diabetes

– Hetta er alt nakað, sum kann betra um umstøðurnar, lívið og framtíðina hjá fólki við diabetes í Føroyum, sigur May-Britt Skoradal frá Diabetesfelagnum

– Vit eru sera fegin um, at mann nú hevur valt at styrkja diabetes-viðgerð í Føroyum.

 

Soleiðis sigur May-Britt Skoradal, forkvinna í Diabetesfelagnum um nýggju ætlanina hjá Novo Nordisk grunninum og Heilsumálaráðnum at stovna eina diabetesmiðstøð í Føroyum.

 

– Hetta er sjálvandi ein visión, sum skal konkretiserast meira. Tað er enn ikki nøkur ítøkilig ætlan um, hvussu tað skal gerast enn. Men vit fegnast um høvuðsmálini, tí hetta er alt nakað, sum kann betra um umstøðurnar, lívið og framtíðina hjá fólki við diabetes í Føroyum, sigur May-Britt Skoradal.

 

– Mann vil fyribyrgja typu-2 diabetes, og tað hevur stóran týdning. Tað er ambitiøst og áhugavert at vilja gera fyribyrgingarætlanir og arbeiða fyri fylgisjúkum. Hetta fer uttan iva at fáa týdning fyri bæði tann einstaka, familjunar og samfelagið sum heild, sigur May-Britt Skoradal.