Sáttmálin er nú gjørdur við amerikanska felagið AerSale um keyp av einum Boeing 757-200 farmaflogfari. Avtalað er, at nýggja føroyska farmaflogfelagið, FarCargo, fær flogfarið um mánaðarskiftið juni-juli.

Flogfarið verður sambært avtaluni latið FarCargo í Phoenix Arizona.

Flogfarið, sum er frá 2001, hevur Rolls Royce motorar, sum hava umleið 28.000 hestakreftir hvør. Annars er flogfarið rættuliga vælútgjørt. Hevur eitt nú RNP navigatiónsútgerð sum ger tað møguligt at lenda, tá sýnið kann verða ivasamt.

– Tað merkir, at nú vita vit, at vit fáa hetta flogfarið, og tað verður latið okkum síðst í junimánaði.

Tað sigur Birgir Nielsen, sum er stjóri í flogfelagnum, sum hann eisini er partaeigari í, í stórari samrøðu við Sosialin.

Eitt sindur um FarCargo:

• Bakkafrost P/F: Meirlutapartaeigari (70%)

• Sp/f 25.05.2021: Minnilutapartaeigari (30%):

Partaeigarar í Sp/f 25.05.2021 eru hesir:

• Heðin Krett, flogskipari, sum hevur 30+ ára royndir við flúgving umframt farmaflúgving

• Hans Meinhart á Høgabóli, flogskipari, sum hevur 40 ára royndir við flúgving umframt farmaflúgving

• Andrew Djurhuus, flogteknikkari, sum hevur 25+ ára royndir úr Atlantic umframt at eiga og reka egnu fyritøkuna AerService í Danmark

• Birgir Nielsen, sum hevur 30 ára royndir innan fíggjarvinnu og privata vinnu. Eigur og rekur egnu fyritøkuna Nira

Lesið stóra samrøðu við Birgir Nielsen, stjóra, og Regin Jacobsen, nevndarformann í FarCargo, í Sosialinum, sum fæst til keyps kring landið, og sum haldarar eisini kunnu lesa á sos.fo