OL finalan í tennis kappingini hjá monnum bleiv spæld í morgun. Alexander Zverev vann heldur óvæntað á Novak Djokovic í semifinaluni, og var hann tí í góðari støðu undan finaluni. Mótstøðumaðurin í dagsins finalu var russiski Karen Khachanov, ið er nummar 25 á styrkislistanum. Zverev var ein greiður favorittur undan dystinum, og hóast Khachanov hevði avrikað væl í OL kappingini higartil, so var munurin ov stórur í finaluni. Zverev breyt servina hjá russaranum og vann sær eina 2-1 leiðslu. Hesa leiðslu varðveitti hann, og megnaði Zverev harumframt at bróta servina hjá Khachanov fyri aðru ferð í fyrsta setti. Zverev vann fyrsta sett 6-3. Í øðrum settið var einvegis ferðsla á stigatalvuni, tí Zverev setti mótsøðumannin uppá pláss, og vísti hví hann er mettur at vera ein tann besti tennisleikarin – og kanska tann besti í sínum aldursbólki. Hann vann seinna settið heili 6-1.
Alexander Zverev er tískil ársins OL vinnari í tennis hjá monnum.
