Nú verður tað í næstum, at nýggjar reglur verða settar fyri, hvussu vit skulu drepa springara í Føroyum. Tað sigur Árni Skaale, landsstýrismaður í veiðimálum. Umstrídda springaradrápið á Skálafjørðinum 12. september í fjør elvdi til eitt ramaskríggj kring allan heim og fyri at taka broddin av tí kunngjørdi løgmaður beinanvegin, at landsstýrið fór at taka málið upp.
Eitt nú kom Havbúnaðarfelagið við eini óvanligari fráboðan, har tey beinleiðis mælti landsstýrinum til at banna springaradrápi. Avleiðingarnar av springaradrápinum á Skálafjøðinum hava verið ógvusligar og viðfevndar fyri alivinnuna, bæði tá tað kemur til umdømi og sølu, sigur Havbúnaðarfelagið. Tí siga eisini, at halda vit fram at drepa springara, kunnu avleiðingarnar næstan ikki yvirmetast. Tí mæltu tey til at banna springaradrápi »áðrenn eitt nýtt dráp verður, sum kann fáa uppaftur meira víðfevndar og drúgvari avleiðingar, enn hendingarnar 12. september høvdu og framvegis hava«, sum Havbúnaðarfelagið orðaði seg.
Síðani hoyrdist ikki nógv aftur – uttan tað, at landsstýrið arbeiddi við málinum. Men nú sigur Árni Skaale, at tað verður ikki so leingi til ein nýggj kunngerð verður lýst um springaradráp. Hann sigur, at arbeitt verður við eini kunngerð um springaradráp og tá ið hon er liðug, verður hon løgd fyri Landsstýrið.
Hann vil ikki siga, akkurat nær tað verður, men nú verður tað ikki leingi, sigur hann. Og tað er greitt, at alivinnan fær ikki sín vilja, tí Árni Skaale ger púra greitt, at tað verður ikki bannað at drepa springara. Heldur verður talan um at skipa springaradrápið betri. Talan hevur eisini verið um at gera onkrar avmarkingar, ella ennrá at seta kvotu á, men tað hevur landsstýrismaðurin onga viðmerking til.
Men hann hevur áður gjørt greitt, at hansara sjónarmið er, at vit skulu ikki frásiga okkum rættin til at gagnnýta okkara náttúrutilfeingi burðardygt. Tað er eitt prinsipp, sum hann ikki er sinnaður at sleppa, hevur hann sagt.
