Tað staðfesti Niels Winther, stjóri í Vinnuhúsinum, í Breddanum í útvarpinum í morgun.
Partarnir skiltust, og verkfall varð lýst, tá teir ikki samdust um semingsuppskotið, sum var ein lønarhækking upp á 11 prosent í tvey ár.
Sum skilst er røringur nú komin í, og partarnir tosa við semingsstovnin. Tað merkir ikki neyðvendigvís, at nýtt semingsuppskot er á veg, men at røringur er komin í.
Tað er altíð soleiðis í eini verkfalsstøðu, at onkur má flyta seg fyrst. Og tað hava arbeiðsgevararnir so gjørt í morgun.
Við útvarpið segði Sonja Jógvansdóttir, at arbeiðarafeløgini hava ikki flutt seg. Spurningurin er so, um samráðingarfólkini hjá arbeiðarafeløgunum eru líka fastløst, sum talskvinna teirra. Sonja Jógvansdóttir er sum skilst ikki partur av samráðingartoyminum.
Útkastið hjá arbeiðsgevarunum var ein lønarhækking, sum lá um 9 prosent. Tey hava helst hildið seg til karmin, sum varð lagdur við almennu sáttmálanum, 4,75 fyri hetta árið. Av tí at inflatiónin gongur niðureftir, halda arbeiðsgevarar helst, at seinna árið skal vera eitt sindur minni enn 4,75 prosent, kanska 4,25 ella 4,5. Tað vil siga umleið 9 prosent yvir tvey ár.
Tá arbeiðsgevararnir nú siga, at teir vilja flyta seg, so gita vit, at teir nú høvdu góðtikið semingsuppskotið, hóast tað ikki er tað, sum teir siga.
Sambært Sonju Jógvansdóttir, so flyta arbeiðarafeløgini seg ikki. Um so er, so er líka vítt sum sítt. Men eitt er, hvat sagt verður. Annað er, hvussu handlað verður. Sjálvandi fara báðir partar at flyta seg.
Spurningurin er so, um báðir partar høvdu góðtikið semingsuppskotið í dag, ella um ein vika ella eitt sindur meira skal ganga at mýkja støðuna. Men nú er so í øllum førum røringur komin í.
