Føroya náttúru og umhvørvisfelag hevur tikið stig til skørudagar. Tiltakið eggjar øllum at fara út at týna garðaskøruna. Tey sum hava sæð garðaskøruna breiða seg uttanfyri hjá sær sjálvum, ella í nærumhvørvinum, kunnu hittast við grannum, familju ella vinum, og fara í hernað móti garðaskøruni. Fyrsti skørudagur verður sunnudagin 14. juli.

Í minsta lagi 6 sløg av skøru vaksa í Føroyum, men tað er einans garðaskøran, Alchemilla mollis, sum veksur alt ov væl og er nærum allastaðni - framvið vegum, áarbakkum, í bønum - allastaðni har hon sleppur, tekur hon yvir. Øll hini skørusløgini eru vakrar upprunaplantur, men garðaskøran er ein innræsin planta, sum merkir, at øll hini plantusløgini mugu víkja undan henni.

Innræsin plantusløg eru plantur, sum eru meira kappingarførar enn onnur plantusløg. Av tí sama eru tær kappingarneytar við okkara uppruna plantufjølbroytni og eru við til at skumpa onnur plantusløg burtur og taka yvir øki.

Garðaskøran hevur fingið gott rótfesti um allar Føroyar, og vit síggja, at vernd av lívmargfeldinum ikki verður raðfest av øllum kommunum kring landið.

Føroya náttúru og umhvørvisfelag hevur gjørt eina vegleiðing, hvussu skøran verður týnd og burturbeind, sí her: www.fnu.fo/skøra

Í samband við átakið, skipar Føroya náttúru og umhvørvisfelag fyri eini kapping. Øll sum luttaka og tagga FNU í stríðnum móti garðaskøruni, eru við í lutakastinum um 3 gávueskjur, sum eru samansettar av lekkrum føroyskum vørum frá m.a. Spírar og sporar, Bjarnastovu og Gómagott.