Tað er greitt, nú grein 25 nevndin hevur skrivað álit. Ein meiriluti, Fólkaflokkurin, Sambandsflokkurin, Framsókn og Miðflokkurin, taka formansskapin í Løgtinginum av ræði og mæla til, at tingfólk fáa tað lønarlyft, sum nevndi, sum gjørdi uppskotið til broyting í lóg um samsýning og eftirløn hjá tingfólki.
Tann nevndin skeyt upp, at tingfólk verða flutt úr 34. og upp i 36. lønarflokk eftir stiganum hjá tænastumonnum. Tað merkir, at tingfólk skulu hava eitt lønarlyft upp á slakar 6.700 krónur um mánaðin. Tað vil siga, at lønan hækkar úr 46.373 krónum um mánaðin upp í 53.058 krónur um mánaðin.
Men formansskapurin broytti uppskotið hjá nevndini soleiðis, at tingfólk ikki skulu fáa lønarlyft við at flyta lønarflokk. Formansskapurin mælti til, at lønin hjá tingfólki verður sum hon er.
Men tað eru bara umboðini hjá Javnaðarflokkinum og Tjóðveldi, sum taka undir við tí, Eyðgunn Samuelsen og Hervør Pálsdóttir.
Grein 25 nevndin býtir seg í tríggjar minnilutar.
Ein annar minniluti, Beinir Johannesen úr Fólkaflokkinum, Sólvit E. Nolsø úr Framsókn og Stefan Klein Poulsen úr Miðflokkinum, mæla til at broyta uppskotið frá formansskapinum soleiðis, at tingfólk fáa lønarlyftið úr 34. upp í 36. lønarflokk.
Triði minnilutin, Johan Dahl úr Sambandsflokkinum er samdur við hesum minnilutanum, men vil harafturat hava, at tingfólk varðveita eitt skattafrítt ískoyti oman á lønina upp á 2.000 krónur um mánaðin.
Álitið frá grein 25 nevndini kann lesast her.