Finska marknavaktin útilokar ikki, at russiska farmaskipið, sum stendur í ljósum loga í Finsku Víkini, hevur hernaðarútgerð umborð.
Tað skrivar Verdens Gang í morgun.
Farmaskipið Sparta II varð leygardagin rakt av tveimum dronum, og myndir vísa, at brúgvin á skipinum hevur fingið stóran skaða.
Finskir myndugleikar halda, at tað er Ukraina, sum stendur aftanfyri álopið.
Finska marknavaktin hevur verið í sambandi við russiskar myndugleikar fyri at fáa greiðu á, hvat er umborð á skipinum, men svarini hava ikki beint illgrunan burtur.
– Vit hava spurt, hvat slag av farmi skipið hevur, men vit hava ikki fingið nakað svar, sum ger, at vit kunnu útiloka, at hernaðarútgerð er umborð.
Tað sigur kommandørurin í finsku marknavaktini, Ilja Iljin, við finska kringvarpið, Yle.
Russiska ríkistíðindastovan Tass sigur hinvegin, at skipið er lastað við máling og lakki, men hetta er ikki váttað av óheftum keldum.
Verdens Gang veit at siga, at Sparta II er ikki eitt vanligt russiskt farmaskip.
- 121 metrar langa skipið verður rikið av einum felag, sum hevur tilknýti til russiska verjumálaráðið, og skipið hevur áður flutt vápn.
Eldurin umborð heldur fram í finskum sjógvi, men øll tey 16 fólkini, sum vóru umborð, eru bjargað umborð á eitt annað russiskt skip, veit Verdens Gang at siga.