Argentina er Copa America meistari aðru ferð á rað. Tað gjørdist veruleiki í nátt føroyska tíð.
Argentina vann í finaluni 1-0 á Kolumbia aftaná longda leiktíð. Finalan var leikt á Hard Rock leikvøllinum í Miami í Florida í USA.
Lautaro Martínez skoraði sigursmálið í 112. minutti.
Kolumbia var betra liðið í fyrra hálvleiki, men teir tóku ikki av málmøguleikunum.
Argentina hevur nú vunnið Copa America 16 ferðir í søguni. Hetta er triðja stóra heitið Argentina vinnur innanfyri trý ár.
Lionel Messi mátti av vøllinum við einum skaða í 66. minutti.
Tað var rok rundanum vøllin í Miami undan finaluni, og tí var finalan seinkað nærum hálvanannan tíma. Kolumbianskir fjepparar, ið ikki høvdu atgongumerki til leikvøllin royndu at bróta seg inn.
Tað hevur í heila tikið gingið illa hjá amerikonsku trygdarfólkunum undir hesari Copa America kappingini, og tað fáa tey eisini ákoyringar fyri.
Talan er um triðja stóra heitið Messi vinnur við Argentina. Messi hevur nú vunnið HM-gull á einum sinni, og Copa America-gull á tveimum sinnum. Harumframt hevur Messi vunnið HM-silvur á einum sinni, og Copa America-silvur á trimum sinnum. Messi hevur eisini vunnið OL-gull og U20 HM við Argentina. Saman við Argentina hevur Messi eisini vunnið interkontinentalu finaluna millum Copa America meistaran og evropameistaran.
Cristiano Ronaldo hevur vunnið eitt EM-gull og eitt Nations League-gull við Portugal, so Messi er væl frammanfyri Ronaldo á tí frontinum.
Talan var um seinasta landsdystin hjá 36 ára gamla, Angel di Maria fyri Argentina. Messi sum er 37 ára gamal hevur enn ikki tikið endaliga avgerð um hann ætlar at vera við til HM í USA, Meksiko og Kanada í 2026.
HER ber til at síggja hæddarpunktini frá Copa America finaluni:
##med2##
HER ber til at síggja argentinska hópin fegnast um sigurin:
##med3##
