Mattias Hellisdal var á vøllinum í 66 minuttir fyri Västerås, og hann sá tveir av sínum liðfeløgum brenna brotsspørk móti Örgryte á Gamla Ullivi leikvøllinum í Göteborg.
Dysturin endaði 0-0. Tá 10 minuttir vóru leiktir brendi Taonsa Axel fyrra brotssparkið hjá Västerås, tá málverjin hjá heimaliðnum megnaði at bjarga tí. Seinni hálvleikur var bert fýra minuttir gamal, tá Abdelrahman Boudah fekk høvið at leggja Västerås á odda við seinna brotssparkinum teir fingu tillutað. Men hann sendi brotssparkið á stongina.
Men 0-0 javnleikurin og samstundis boðini um, at Degerfors á heimavølli hevði tapt 1-2 fyri GAIS komu væl við hjá liðnum Áka D. Samuelsen og Martini Agnarssyni, Mjällby.
Nú Örgryte og Degerfors hava bert tveir dystir eftir at leika hava tey 20 stig hvør. Mjällby sum hevur tríggjar dystir eftir at leika hevur longu 27 stig, og tí kann føroyingaliðið spæla frítt í trimum teimum seinastu dystunum. Halmstad, ið er aftast í deildini við 17 stigum kann eisini í mesta lagi røkka 26 stigum.
Sostatt rætti Mattias Áka og Martini eina hjálpandi hond við javnleikinum í Göteborg í dag.
Seinnapartin í morgin klokkan 15.30 spælir Mjällby dyst á útivølli móti Brommapojkarna. Høvuðsfokus hjá Mjällby nú verður at vinna seg víðari úr deildarspælinum í Conference League, har teir hava fingið eina góða byrjan við sjey stigum fyri tríggjar teir fyrstu dystirnar.
