Liðið hjá Poul Kallsberg, Hillerød er nummar sjey í næstbestu donsku fótbóltsdeildini við 15 stigum. Teir eru bert eitt stig frá AaB, ið er á gylta sætta plássinum sum gevur atgongd til ovara endaspælið aftaná lokið grundspæl.
Poul var á vøllinum seinasta stóra korterið, tá Hillerød á heimavølli vann 3-1 á Kolding. Stóra hetjan hjá Hillerød var Frederik Høgh, ið skoraði reint hattrick.
Leygarkvøldið 21. november hevur Hillerød dyst á útivølli móti FC Fredericia.
Men áðrenn tað fer Poul saman við landsliðsliðfeløgunum at hugsavna seg um landsliðsuppgávurnar í Nations League móti Slovakia á útivølli komandi fríggjakvøld klokkan 19.45, og tríggjar dagar seinni á heimavølli móti Moldova.
