Í august vóru 336 fólk rakt av arbeiðsloysi. Tað eru 38 færri enn sama mánað í fjør.
Umroknað til fulltíðararbeiðsleys vóru 276 fólk arbeiðsleys. Tað eru 34 færri enn í august 2025.
Arbeiðsloysið hevur ligið sera lágt seinastu mánaðirnar. Eisini í juli var tað 0,9 prosent, meðan tað í mars var eitt prosent.
Fleiri arbeiðsleysir menn enn kvinnur
Arbeiðsloysið er framvegis størri millum menn enn kvinnur.
125 kvinnur vóru raktar av arbeiðsloysi í august. Umroknað til fulla tíð vóru tær 102, og arbeiðsloysið hjá kvinnum var 0,7 prosent.
211 menn vóru raktir av arbeiðsloysi. Umroknað til fulla tíð vóru teir 174, og arbeiðsloysið hjá monnum var 1,1 prosent.
Hjá báðum kynum er arbeiðsloysið minkað 0,1 prosentstig samanborið við august í fjør.
Nærum tríggjar ferðir so høgt í Suðuroy
Stórur munur er á arbeiðsloysinum kring landið.
Suðuroy hevur størsta arbeiðsloysið við 1,9 prosentum. Tað er tó 0,3 prosentstig minni enn í august í fjør.
Minst er arbeiðsloysið í Norðoyggjum og Sandoynni, har tað í báðum økjum er 0,6 prosent. Arbeiðsloysið í Suðuroy er sostatt meira enn tríggjar ferðir so høgt sum í hesum økjunum.
39 hava verið arbeiðsleys í meira enn eitt ár
Hagstovan hevur eisini hugt at, hvussu leingi tey arbeiðsleysu hava verið uttan arbeiði.
Størsti bólkurin – 36 prosent – hevði verið arbeiðsleysur í ein til tríggjar mánaðir.
Men 39 fólk, ella góð 12 prosent av teimum arbeiðsleysu, høvdu verið arbeiðsleys í meira enn eitt ár. Sambært Hagstovuni hevur talið av langtíðararbeiðsleysum verið rættiliga støðugt yvir tíð.
Arbeiðsloysið er størst millum tey 35–44 ára gomlu, har tað er 1,3 prosent. Hjá teimum 25–34 ára gomlu er tað 1,2 prosent.
Minst er tað hjá teimum 16–24 ára gomlu og teimum 55–66 ára gomlu, har arbeiðsloysið er 0,6 prosent.
