Sambært norska kringvarpinum - NRK - varð í gjár leitað við dronum, men sum dagurin leið, noyddist norska løgreglan at ásanna, at leitingin hevði verið úrslitaleys.

Sama kvøld, sum tey fýra vórðu saknað, varð báturin, sum ferðafólkini høvdu leigað, funnin holvdur, eins og líkið av einum av teimum fýra eisini varð funnið.

Síðan tá hevur leitingin ikki givið úrslit og tey trý, sum eftir øllum at døma eisini eru sjólátin, eru ikki funnin aftur.

Í norskum miðlum í dag, skilst, at øll tey fýra, sum vóru saman á hesi feigdarferð, vóru menn, og onkur miðil hevur skrivað, at hetta vóru tilkomnir menn.

Øll í leigaða bátinum vóru partur av einum ferðalagi úr Kekki - átta fólk tilsamans, men higartil er einki komið fram um, hvørt hetta vóru pør ella einstaklingar.

Greitt er, at hetta er ein syrgilig vanlukka.

Høvuðsbjargingarstøðin í Noregi hevur gjørt útrokningar, sum siga, hvussu sjóvarfallið var, tá vanlukkan hendi, og hvar líkini møguliga kunnu vera rikin.

Tí hevur verið leitað fram við landi á leiðum, har hugsandi kundi verið, at líkini vóru rikin á land, men higartil hevur leitingin verið úrslitaleys.

Norskir miðlar skriva, at tað er ógreitt, um menninir í bátinum høvdu bjargingarvestar.

Í gjár byrjaði løgreglan teknisku kanningarnar av bátinum. Sagt hevur verið, at báturin var heilur, tá hann varð funnin, men fór í tvey, tá roynt varð at taka hann upp.

Norska kringvarpið hevur í fleiri dagar roynt at fingið orð á felagið, ið leigaði bátin út til frítíðarfisking, sum teir fýra menninir úr Kekkia vóru í lagnudagin.

Men, felagið hevur ikki svarað fyrispurningum um, hvørja upplæring tey fáa sum leiga bátar - ei heldur, hvørja trygdarútgerð fólkini høvdu, sum leigaðu bátin henda dagin.

Í einum sms-boðum til NRK hevur felagið sagt, at orsakað av kanningararbeiðnum, sum nú er í gongd, kunnu tey ikki koma við nøkrum uppýsingum til miðilin.

NRK veit at siga, at bara í ár eru sjey ferðafólk, sum hava leigað bátar til slíkar fiskitúrar í Noregi, sjólátin