Smyril Line fekk í gjár, 16. oktober, nýggja farmaskipið Akranes handað frá CIMC Raffles-skipasmiðjuni í Yantai í Kina.

Akranes er seinna av teimum báðum nýggju Ro-Ro-farmaskipunum, sum felagið hevur latið smíðað. Sambært Smyril Line er ætlanin, at skipið fer úr Kina við kós móti Evropa í næstu viku.

Meðan Akranes sostatt er klárt at fara avstað, bíðar hitt nýggja skipið, Skipanes, framvegis eftir at sleppa víðari.

Skipanes liggur í Hong Kong, har tað verður umvælt eftir eldsbrunan í maskinrúminum 2. september. Skipið var tá júst farið av skipasmiðjuni við kós móti Føroyum, men noyddist til Hong Kong til umvælingar.

Sambært Kringvarpinum verða umvælingarnar væntandi lidnar síðst í november.

Akranes og Skipanes eru systurskip og skulu bæði inn í verandi rutunet hjá Smyril Line. Samanlagt hevur felagið gjørt íløgur fyri meira enn eina milliard krónur í tey bæði farmaskipini.