Eftir bert fáum døgum er Katie Zacharia liðug sum talskvinna í Hvítu Húsunum. Tað skriva fleiri miðlar, teirra millum The New York Times, CNN og BBC, sambært Ritzau.

Samskiftisstjórin í Hvítu Húsunum, Steven Cheung, sigur við The New York Times, at hon fær aðrar uppgávur, sum verða kunngjørdar seinni.

Í nátt takkaði Zacharia amerikanska forsetanum, Donald Trump, í einum uppslagi á sosiala miðlinum X.

– Tað var ein heiður at arbeiða fyri hann, skrivar hon.

Trump segði fríggjadagin, at hann hevði mælt henni til at umhugsa sín leiklut av nýggjum. Hann legði afturat, at starvið møguliga ikki hóskaði til hennara.

– Eg segði við hana: »Heilt erligt, var eg tú, hevði eg umhugsað tað av nýggjum«, segði Trump.

Zacharia tók við starvinum mánadagin, men longu týsdagin vakti fyrsta tíðindafundurin hjá henni ans. Hon tóktist sjónliga fjálturstungin, las upp úr fyrireikaðum notatum og svaraði bert fáum spurningum.

Tíðindafundurin vardi minni enn eitt korter. Undir fundinum kom hon eisini til at umrøða mann sín sum forsetan.

Ein journalistur spurdi hana, hvar hon hevði staðið próvtøkuna, sum gevur loyvi at virka sum advokatur í USA.

– Tá eg var í Kina, svaraði hon.

Seinni í vikuni mátti 41 ára gamla Zacharia tó viðganga, at hon ongantíð hevði staðið hesa próvtøkuna, hóast hon fleiri ferðir hevði umrøtt seg sjálva sum advokat.

Demokratarnir síggja stutta tíðarskeiðið hjá Zacharia í starvinum sum eitt tekin um, at Republikanski flokkurin er viknaður undan miðskeiðisvalinum 3. november.

– Talskvinnan í Hvítu Húsunum er farin. MAGA-ekstremistarnir halda fram við at detta sundur, skrivar leiðarin hjá Demokratunum í Umboðsmannatinginum, Hakeem Jeffries, á X.

Kelda: Ritzau