Aftaná átta bummtúrar bragdaði tað loksins hjá Rúnar Hammer og liðfeløgunum í Stoholm í næstbestu donsku hondbóltsdeildini.
Í botnuppgerðini móti AGF í Stoholm Fritids-og Kulturcenter eydnaðist tað heimaliðnum at vinna ein greiðan 31-25 sigur á AGF. Í steðginum var støðan javnleikur 14-14.
Rúnar var við níggju málum toppskjútti hjá Stoholm. Fýra av málunum vóru upp á brotskøst.
Stoholm er næstaftast í deildini við tveimum stigum. Skal Stoholm bjarga plássinum í deildini mugu teir í ringasta føri enda á fjórðaftasta plássinum aftaná lokna kapping.
Í morgin klokkan 15 tekur liðið hjá Kjartani Johansen, Vendsyssel á heimavølli móti liðnum hjá Róa Ellefsen á Skipagøtu, Aarhus.
