Valið í Svøríki kann enda við minsta møguliga meiriluta.

Sambært fyrstu forsøgnini hjá svenska kringvarpinum SVT fáa reyðgrønu andstøðuflokkarnir 175 av teimum 349 sessunum í Ríkisdegnum, meðan borgarliga stjórnin hjá Ulf Kristersson og stuðulsflokkar hennara fáa 174.

Reyðgrøni vongurin stendur til 49,3 prosent av atkvøðunum, meðan borgarligi vongurin stendur til 49,2 prosent.

– Hetta er heilt ótrúligt. Eg vænti, at tað fer at sveiggja alt kvøldið. Hetta er nervapirrandi, sigur valgranskarin Henrik Ekengren Oscarsson í valstovuni hjá SVT.

Eisini svenski valmyndugleikin hevur gjørt eina forsøgn, sum gevur reyðgrøna vonginum minsta møguliga meiriluta: 175 sessir móti 174.

Centerpartiet stuðlar reyðgrøna vonginum, har Socialdemokraterna við Magdalenu Andersson á odda er størsti flokkur.

Kristersson ætlar ikki at geva skarvin yvir

Fleiri svenskir miðlar skriva, at sitandi forsætisráðharrin Ulf Kristersson ikki ætlar at viðurkenna seg sum tapara, sjálvt um reyðgrønu flokkarnir enda við meirilutanum.

Keldur í Moderaterna vísa á, at andstøðan ikki hevur eitt liðugt stjórnaralternativ. Stórur politiskur munur er millum flokkarnar í reyðgrøna veinginum, og serliga kunnu ósemjurnar millum Centerpartiet og Vänsterpartiet gera tað trupult at skipa stjórn.

Borgarligi vongurin hevur roynt at fáa Centerpartiet yvir á sína síðu, men flokkurin hevur higartil avvíst samstarv við Sverigedemokraterna.

Sverigedemokraterna stendur til afturgongd, men flokkurin kann kortini fáa avgerandi leiklut. Hann kann annaðhvørt gerast partur av eini borgarligari stjórn ella halda fram sum stuðulsflokkur.

Forsøgnin hjá SVT byggir á veruliga upptaldar atkvøður. Tá hon varð kunngjørd, vóru atkvøðurnar taldar upp í 2.895 av teimum 6.626 valhølunum.

Fyrstu exit-poll kanningarnar beint eftir klokkan 20 vístu annars ein greiðari reyðgrønan sigur. Men so hvørt sum veruligu atkvøðurnar eru taldar upp, er munurin minkaður niður í næstan einki.