Føroyski hondbóltsleikarin Elias Ellefsen á Skipagøtu kann skifta úr týska THW Kiel til Aalborg Håndbold komandi summar.
Tað veit TV 2 Sport at siga.
Sambært upplýsingunum hjá danska miðlinum er Aalborg nær við at kunna kunngera eina avtalu við 24 ára gamla føroyska spælskiparan.
Elias hevur spælt við THW Kiel síðani 2023, men sáttmálin við týska stórfelagið gongur út komandi summar. Tí kann Aalborg fáa føroyingin uttan at rinda Kiel nakað í skiftispeningi.
Aalborg hevur seinastu árini fingið fleiri stór nøvn til felagið, og sambært TV 2 Sport skal Elias vera við til at røkka stóra málinum hjá danska meistarafelagnum: at vinna Champions League.
Elias Ellefsen á Skipagøtu hevur eisini verið ein av størstu profilunum á føroyska landsliðnum, sum hevur vakt ans á seinastu endaspølunum.
Aalborg Håndbold vildi sunnukvøldið ikki gera viðmerkingar til upplýsingarnar hjá TV 2 Sport um samráðingarnar við føroyska landsliðsleikaran.
