Í kvøld kom ferðamannaskipið National Geographic Endurance á Havnina og liggur nú á molanum.
Skipið kom sambært skránni hjá Tórshavnar Havn klokkan 21 í kvøld, 21. september, og verður liggjandi í Havn heilt til klokkan 22 í annaðkvøld 22. september. Tor Shipping er agentur hjá skipinum.
National Geographic Endurance er eitt ekspeditiónsskip hjá Lindblad Expeditions. Tað er bygt til sigling í póløkjum og er tí øðrvísi enn nógv av teimum stóru ferðamannaskipunum, sum hava vitjað Havnina í summar.
National Geographic Endurance tekur 138 ferðafólk, og sambært reiðarínum kann manningin og starvsfólkahópurin vera upp í 116 fólk. Sostatt kunnu vera upp í 254 fólk umborð.
Skipið er 124 metrar langt og er bygt til rannsóknarferðir í póløkjum. Tað vitjaði eisini í Funningi í dag, áðrenn leiðin gekk til Havnar.
Trý skip afturat
Ferðamannaskipavertíðin í Havn er nú um at vera av á hesum sinni. Tá National Geographic Endurance er farið avstað aftur týskvøldið, eru tríggjar vitjanir eftir á skránni hjá Tórshavnar havn.
Mikudagin 23. september koma tvey skip: World Navigator kemur klokkan 07 og fer aftur klokkan 14, meðan World Voyager kemur klokkan 12 og fer klokkan 23.30.
Seinasta ferðamannaskipið í Havn í ár verður Spitsbergen hjá Hurtigruten. Tað kemur 29. september klokkan 19.30 og fer avstað aftur 30. september klokkan 13.
Við National Geographic Endurance eru sostatt fýra ferðamannaskipavitjanir eftir frá og við í kvøld, og tá Spitsbergen fer 30. september, er ferðamannaskipavertíðin í Havn av fyri 2026.
Sambært seinastu uppgerðini verður samlaða talið í ár 50 ferðamannaskipavitjanir, um eingi nýggj avboð koma. Fyrsta skipið í ár, Ocean Explorer, kom 5. mai.
