Í eina tíð hava børnini í Barnagarðinum í Gerðinum í Skopun, børnini í Frítíðarskúlanum og skúlabólkurin gjørt ymiskar lutir, sum tey skuldu selja í samband við stóru innsavningina hjá Reyða Krossi.

Í Skopunar kommunu verður víst á, at ætlanin var at selja uttanfyri, har kommunuskrivstovan er, men veðrið í gjár var so keðiligt, at farið varð inn í Undirhúsið, sum er í sama bygningi.

- Frá klokkan 10-11 vóru tað børn í barnagarðsaldri, ið seldu ymiskt, sum tey høvdu perlað, og so framførdu tey eisini onkrar sangir.

Í tímanum frá klokkan 14-15 vóru tað børn úr Frítíðarskúlanum og skúlabólkinum sum seldu tálgaljós, sum tey sjálvi høvdu gjørt.

- Børnini seldu fyri slakar 4000 krónur, og peningurin fer óskerdur til Reyða Kross, verður sagt í Skopunar kommunu í dag.