Norskir miðlar skriva, at ein granat - ella spreingiknøttur - er funnin á einum ruskplássi í Moss í morgun, og í hesum sambandi er ruskplássið stongt.

Løgregla og verja meta nú um, hvussu spreingiknøtturin skal handfarast, sigur átaksleiðarin hjá løgregluni í økinum, Nikolai Mathisen.

Hann leggur aftrat, at tað helst verður norska verjan, sum kemur at taka sær av hesum, og ætlandi lata partar av ruskmóttøkuni uppaftur um middagsleitið, lokala tíð.

- Um tú finnur okkurt, sum líkist hesum, eigur tú at ringja til løgregluna, og sum høvuðsreglu eigur tú ikki sjálvur at gera av, hvussu hetta skal burturbeinast.

Tað sigur Shervin Jahromi hjá løgregluni við tv2.no í morgun.

Hann leggur aftrat, at eingin eigur at lata ein spreingiknøtt - ella eina granat - til ruskplássið.

Í norskum miðlum í morgun verður einki sagt um, hvaðani spreingiknøtturin møguliga er komin, ei heldur, um hetta er ein lødd granat ella ei.