Eivør verður eitt av stóru nøvnunum á tónleikafestivalinum Bergmál, sum verður hildin á Ísafirði í Íslandi 6. og 7. august 2027.
Tað boða íslendskir miðlar frá.
Tað er kendi íslendski rokkbólkurin Kaleo, sum stendur aftan fyri nýggja tónleikafestivalinum, har fleiri av kendastu tónlistafólkunum í Íslandi fara at framføra.
Umframt Eivør verða millum onnur Bubbi Morthens og Mugison at hoyra á stevnuni.
Høvuðskonsertirnar verða á bryggjuni á Ísafirði, har fyrireikararnir ætla at skapa eina serliga konsertuppliving við vestfirsku fjøllunum sum bakgrund.
Ætlanin er at selja 8.000 atgongumerki til festivalin, sum verður eitt av stóru tónleikatiltøkunum í Vestfirðum næsta summar.
Eivør hevur í nógv ár havt stóran áhuga millum íslendingar og hevur fleiri ferðir framført í Íslandi. Hon hevur eisini samstarvað við íslendsk tónlistafólk.
Við luttøkuni á Bergmál verður føroyska songkvinnan aftur at hoyra á einum stórum íslendskum tónleikatiltaki.
Tónleikastevnan varð kunngjørd hósdagin.
Keldur: RÚV og Morgunblaðið.