Umleið klokkan 10.30 í gjár fekk løgreglan boð um eld í einum hjalli á Skála.

Ein persónur á staðnum royndi at sløkkja við einari havaslangu, og sløkkiliðið varð boðsent. Tað gekk skjótt at fáa tamarhald á eldinum, og umleið tíggju minuttir eftir fráboðanina var sløkt.

Beint fyri klokkan 18 kom eisini ein fráboðan um møguligan eld í sambandi við vegarbeiði á Tvøroyri. Ein persónur hevði sæð neistar og hoyrt brestir.

Tað vísti seg at stava frá leidningum, sum vóru fríttlagdir. Átaksleiðarin fór á staðið og tók sær av málinum.

Løgreglan fekk eisini fráboðan um herverk á ein bil í Skopun í gjáramorgunin. Eigarin hevði varnast, at bilurin var fluttur og hevði fingið fleiri skøvur í lakkið.

Hetta skal vera hent náttina fyri. Lyklarnir vóru ikki í bilinum, og mett verður, at hann helst er skumpaður.

Beint eftir klokkan 19 í gjár varð ein patrulja send til eitt privat heim í norðurøkinum, har ein persónur sambært fráboðanini var óður og tveitti lutir inni í húsinum.

Talan var um eitt par, sum var farið at klandrast. Annar parturin varð burturvístur og koyrdur til familju aðrastaðni.

Løgreglan var eisini við róðrarneystið á Argjum, eftir at boð komu um, at ein persónur lá og svav har. Løgreglufólk vaktu viðkomandi, so hann kundi koma heim.