Í gjár undirritaðu Bárður á Steig Nielsen, landsstýrismaður í uttanríkis- og fiskivinnumálum, og Ling Ji, varahandilsmálaráðharri í Kina, semjuskjal í Beijing.

- Semjuskjalið er eitt týdningarmikið stig í eini longri tilgongd at menna handilssamstarvið millum Føroyar og Kina og leggur lunnar undir víðari arbeiðið at virka fyri einum fríhandilssáttmála.

Soleðis verður sagt í uttaníkis-og fiskimálaráðnum í dag.

- Semjuskjalið byggir á eitt áralangt arbeiði at menna handilslviðurskiftini landanna millum.

Víst verður á, at eitt týðandi stig varð tikið í fjør, tá heilsufrøðiligu protokollirnar um vilt veiddan fisk og fiskalýsi og fiskamjøl vórðu undirritaðar.

- Við nýggja semjuskjalinum verður hildið fram við hesum arbeiði, og partarnir eru samdir um at fara undir eina tilgongd, sum hevur til endamáls at fáa í lag fríhandil.

Føroyska vinnan skal hava góðar fortreytir at virka á altjóða marknaðum.

- Tí er umráðandi, at vit støðugt kanna nýggjar møguleikar og arbeiða fyri betri marknaðaratgongd. Við semjuskjalinum styrkja vit grundarlagið undir handilssamstarvinum við Kina.

Tað sigur Bárður á Steig Nielsen, landsstýrismaður.

Sagt verður, at áðrenn undirritanina, hevði landsstýrismaðurin fund við Ling Ji, varahandilsmálaráðharra. Harumframt hevur landsstýrismaðurin havt fund við Cai Wei, varauttanríkisráðharra.

- Á báðum fundunum fegnaðust partarnir um semjuskjalið og umrøddu týdningin av hesum fyri samstarvið, verður sagt í uttanríkis-og fiskimálaráðnum í dag.