Gianni Infantino, forseti í FIFA, hevur svikið álitið við sviki í málinum um ætlanina at selja privatum íleggjarum part av kappingunum hjá FIFA.

Tað siga evropeiska UEFA, asiatiska AFC og Concacaf fyri Norður- og Miðamerika og Karibia í eini felags fráboðan mánadagin.

– Tá álitið verður brotið við sviki, og ein persónur setir seg sjálvan oman fyri felagsskapin, sum hevur litið honum myndugleika upp í hendur, hevur hann svikið sína skyldu, skriva forsetarnir í teimum trimum fótbóltssambondunum.

Í juli løgdu FIFA og Infantino fram ætlanina um eitt nýtt handilsligt felag, Fifa Forward Enterprise, FFE. Ætlanin var at selja privatum íleggjarum part í kappingunum hjá FIFA.

Hetta elvdi til stóra ónøgd, serliga í Evropa. Infantino tók seinni uppskotið aftur, men tað hevur ikki kyrrað mótstøðuna.

UEFA, AFC og Concacaf krevja nú, at ein óheftur triðipartur kannar málið og ger eina frágreiðing.

– Tað er neyðugt í ljósinum av einum so álvarsligum troti á dømingarevni, siga sambondini.

DBU og fleiri onnur tjóðarsambond fingu í juli bræv frá FIFA um ætlanina. Sambært Ritzau fingu sambondini freist til 19. september at boða frá, um tey stuðlaðu verkætlanini. Stuðlaðu tey uppskotinum, vóru útlit til fleiri íløgupengar frá FIFA.

Eftir fund millum limalondini boðaði UEFA frá, at sambandið var til reiðar at boykotta HM og aðrar FIFA-kappingar í mótmæli móti ætlanunum.