Tá Jensen Huang í 2024 var á einari tøkniráðstevnu í Taiwan, róptu fjepparar navn hansara og bóðu um sjálvsmyndir og autografar. Stjórin í Nvidia var vorðin so kendur, at Facebook-stovnarin Mark Zuckerberg samanbar hann við Taylor Swift.

Jensen Huang er 63 ára gamal og føddur í Taiwan. Familjan flutti til Tailands, tá hann var fimm ára gamal. Fýra ár seinni vórðu hann og eldri beiggi hansara sendir til USA at búgva hjá einum mammu- ella pápabeiggja. Sambært The Independent endaðu teir av misgáum á einum strongum kostskúla í Kentucky.

Seinni búsettist familjan í Oregon. Huang las til elektroverkfrøðing á Oregon State University og las síðani víðari á Stanford University. Undir lestrinum hitti hann Lori Huang, sum hann er giftur við. Tey eiga tvey børn, sum bæði hava leiðandi størv í Nvidia.

Sá møguleikarnar í grafikkortunum

Í 1993 stovnaði Huang Nvidia saman við Chris Malachowsky og Curtis Priem. Teir tríggir skulu hava stovnað felagið á einari Denny’s-matstovu í USA. Huang hevur verið stjóri síðani.

Nvidia varð fyrst kent fyri grafikkort til telduspøl. Huang sá tíðliga, at somu prosessorar kundu brúkast til aðrar uppgávur. Tað legði lunnar undir, at Nvidia fekk ein týðandi leiklut í menningini av vitlíki og gjørdist eitt av heimsins virðismestu feløgum.

Stjórasessurin kann vera í vanda

Huang hevur viðgingið, at hann hevur havt eitt samband við eina sølukvinnu, sum sambært The New York Times er undir illgruna fyri at njósnast fyri Kina. Mikudagin skrivaði sama blað, at Huang eisini skal hava havt eitt samband við eitt leiðandi starvsfólk í Nvidia, sum starvaðist undir honum.

Partabrævið hjá Nvidia er fallið nógv, síðani søgurnar komu fram, skrivar Ritzau. Sambært The Wall Street Journal kann málið enda við, at Huang missir stjórasessin.

Ritzau