Demokraturin Scott Colom hevur vunnið senatsvalið í Mississippi, metir valredaktiónin hjá CNN sambært Ritzau. Tað er fyrstu ferð síðani 1982, at ein demokratur vinnur eitt senatsval í statinum.
Við 99 prosentum av atkvøðunum taldum stendur Colom til at fáa 49,2 prosent, meðan Cindy Hyde-Smith stendur til at fáa 48,7 prosent.
Úrslitið er ein stórur ósigur hjá republikanarunum í einum stati, sum Donald Trump vann við 22 prosentstigum á forsetavalinum í 2024. Tá Hyde-Smith varð afturvald í 2020, vann hon við 10 prosentstigum. Colom verður fyrsti svarti senatorurin úr Mississippi síðani tíðina eftir amerikanska borgarakríggið.
Steðgaði tilnevningini hjá Colom
Scott Colom er 43 ára gamal. Hann var dómari og lokalur ákæri, áðrenn hann í 2015 varð valdur til økisákæra fyri fýra sýslur í Mississippi. Í 2022 tilnevndi Joe Biden, táverandi forseti, hann til starvið sum samveldisdómari. Annar senatorurin úr Mississippi, Roger Wicker, var til reiðar at stuðla tilnevningini, men Hyde-Smith noktaði at góðkenna hana.
Hyde-Smith vísti til tilnevningina, tá hon á valkvøldinum tók sigurin upp á forskot.
– Eg forðaði Scott Colom í at gerast samveldisdómari, og tit forðaðu honum í at gerast amerikanskur senator, segði hon sambært Mississippi Today.
Demokratarnir høvdu longu tryggjað sær meirilutan í Senatinum. Við úrslitinum í Mississippi standa teir til at fáa 55 sessir, meðan republikanararnir hava vunnið 44. Alaska er einasti staturin, har senatsvalið enn er óavgjørt.
