Løgreglan fekk umleið klokkan 17 í gjár boð um, at sera hált var í vesturbýnum í Havn. Tað vísti seg, at olja var á vegnum, og fleiri fráboðanir komu um somu støðu aðrastaðni í býnum.

Sum in.fo skrivaði í gjár var olja í øllum førum á Jóannesar Paturssonargøtu, Grønlandsvegnum, Ringvegnum og Villingadalsvegnum.

– Tað er ræðuliga, ræðuliga hált. Fólk mugu koyra so varliga, sum tey kunnu, segði vaktleiðarin við in.fo í gjár.

Sløkkiliðið varð boðsent, og vegirnir vórðu skolaðir fyri at fáa oljuna burtur. Meðan arbeitt varð við støðuni, ávaraði løgreglan bilførarar og gjørdi vart við, at olja eisini kundi vera á øðrum vegum í Havn.

Løgreglan royndi at kanna, hvaðani oljan stavaði, men fann ikki fram til, hvør hevði verið atvoldin til dálkingina.