Fríggjadagin hin 6. november verður hátíðarhildið, at dagstovnurin Lítlifløttur í Sjóvar kommunu verður 20 ár, og í hesum sambandi verður alment hátíðarhald henda dagin frá klokkan 15-17.
Í Sjóvar kommunu siga tey, at almenna hátíðarhaldið verður í bygdarhúsinum á Strondum við hesari skrá:
Barnagarðsbørn, børn í skúlabólki og børn í frítíðarstovu syngja
Varaborgarstjórin ber fram føðingardagsheilsu.
Rakul Ró og William syngja Kular Røtur
Í Sjóvar kommunu siga tey, at eftir hátíðarhaldið eru øll hjartaliga vælkomin til kaffi og køku, og sjálvandi verður eisini okkurt leskiligt til børnini.
Lítlifløttur er dagstovnurin í Sjóvar kommunu, sum hýsir børnum í øllum aldri – frá vøggustovualdri til frítíðarstovualdur.
- Vit eru sera errin av okkara barnagarði, sum vit halda vera Føroya besti. Við dugnaligum og trúføstum starvsfólkum og einum uttandura spæliøki í serflokki hava børnini góðar karmar at trívast, mennast og læra.
Víst verður á, at síðan dagstovnurin læt upp hin 6. november 2006, eru tríggjar útbyggingar gjørdar.
- Í mai 2008 varð ein nýggjur bygningur bygdur til frítíðarstovubørnini. Í september 2019 lótu tríggjar nýggjar vøggustovur upp í nýggjum bygningi, og á sumri 2023 læt enn ein nýggj frítíðarstova upp í bygningi, sum varð bygdur afturat gomlu frítíðarstovuni. Her húsast skúlabólkurin nú.
Í Sjóvar kommunu halda tey, at dagstovnurin liggur í einum avbera góðum og fjølbroyttum umhvørvi.
- Fótbóltsvøllur og bygdarhús umringa stovnin, og stóri uttandura spæligarðurin gevur børnunum alskyns møguleikar fyri spæli og upplivingum.
Lagt verður aftrat, at Gerðá rennur gjøgnum spæliøkið, har børnini kunnu vassa og spæla, og handan garðin er berg at klintra í.
- Um nøkur ár verður vónandi ítróttarhøll í sama umhvørvi, sum fer at geva enn fleiri møguleikar.
Í Sjóvar kommunu siga tey, at øll eru hjartaliga vælkomin í føðingardag hjá Lítlafløtti í bygdarhúsinum á Strondum fríggjadagin hin 6. november.
- Vit gleða okkum at síggja tykkum!
