Avgerðin varð tikin mánakvøldið, dagin fyri miðskeiðisvalið í USA.
Tað skrivar tíðindastovan Reuters.
Stjórnin hjá Donald Trump hevði bert fáar tímar frammanundan biðið hægstarætt um at viðgera málið sum skundmál.
Stjórnin hevur illgruna um, at umleið 20.000 brævatkvøður í Kalifornia eru latnar av fólkum, sum ikki hava amerikanskan ríkisborgararætt.
Tí vildi stjórnin hava atkvøðurnar lagdar til síðis, til staðfest var, um veljararnir høvdu amerikanskan ríkisborgararætt.
Men hægstirættur hevur nú víst kravið aftur.
Dómari: Kravið kann vera í stríð við grundlógina
Fyrr mánadagin hevði ein samveldisdómstólur eisini víst aftur einum líknandi kravi frá stjórnini.
James Boasberg, dómari við samveldisdómstólin í Washington D.C., metti, at kravið helst var í stríð við amerikonsku grundlógina.
Hann vísti á, at grundlógin gevur einstøku statunum og Kongressini heimild at áseta valreglur, ikki forsetanum.
Dómarin gav tí stjórnini boð um at sleppa kravinum um at leggja brævatkvøðurnar til síðis.
Kalifornia vísir aftur illgrunanum
Trump-stjórnin hevur í ár lagt stóran dent á at kanna, um fólk uttan amerikanskan ríkisborgararætt hava atkvøtt á miðskeiðisvalinum.
Stjórnin hevur gjørt ein lista yvir fólk, sum hon hevur illgruna um ikki eru amerikanskir ríkisborgarar.
Men myndugleikarnir í Kalifornia hava sambært AP lýst listan sum sera óálítandi.
Teir meta, at nógv av fólkunum á listanum helst eru amerikanskir ríkisborgarar og sostatt hava valrætt.
Sambært AP kemur tað sera sjáldan fyri, at fólk uttan amerikanskan ríkisborgararætt atkvøða á amerikonskum valum.
Óttaðist, at atkvøðurnar ikki kundu skiljast sundur aftur
Amerikanska løgmálaráðið hevði biðið hægstarætt um eitt fyribils forboð, sum skuldi tryggja, at tær umstríddu brævatkvøðurnar ikki vórðu taldar saman við hinum atkvøðunum, meðan málið varð viðgjørt.
John Sauer, sum umboðaði stjórnina í málinum, grundgav kravið við, at tað ikki fór at bera til at skilja atkvøðurnar sundur aftur, um tær fyrst vóru blandaðar saman við hinum.
Men hægstirættur hevur nú víst áheitanini aftur.
Kalifornia er fólkaríkasti staturin í USA, og avgerðin kemur bert fáar tímar undan miðskeiðisvalinum týsdagin.
/Ritzau/Reuters/AP
