Herfyri tók Róland Toftum sæti í Vágs býráði, nú Erhard Joensen er farin í farloyvi.
Hann tekur sostatt við sum formaður í teknisku- og umhvørvisnevndini, umframt at vera partur av býráðnum annars.
Róland, sum er 27 ára gamal, er útbúgvin maskinsmiður á Vágs Skipasmiðju. Í løtuni lesur hann til maskinmeistara á Vinnuháskúlanum.
Hann er eisini kendur frá bæði føroyskari og altjóða svimjing, har hann hevur vunnið fleiri heiðursmerki.
Á kommunuvalinum í 2024 fekk Róland Toftum triðflestar atkvøður á listanum hjá Sambandsflokkinum.
