Ferðafólk, sum skulu við Smyrli í morgin, mikudagin 14. oktober, mugu fara fyrr frá húsum enn ætlað.

Strandferðslan boðar á heimasíðu síni frá, at fráferðin av Krambatanga klokkan 06 verður framskundað til klokkan 05. Úr Havn fer Smyril klokkan 07.30 í staðin fyri klokkan 08.45.

Hinir fýra túrarnir mikudagin eru avlýstir vegna veður. Talan er um fráferðirnar av Krambatanga klokkan 11.30 og 18.45 og úr Havn klokkan 16 og 21.15.

Óvissa er eisini um siglingina hósdagin 15. oktober. Strandferðslan boðar frá, at broytingar og avlýsingar kunnu væntast í ferðaætlanini hjá Smyrli vegna vánaligu veðurforsøgnina.

Á hinum oyggjaleiðunum kunnu broytingar og avlýsingar eisini væntast mikudagin. Hetta fevnir um siglingina til Mykinesar, Kalsoyar, Svínoyar og Fugloyar, Hests, Skúvoyar og Nólsoyar.

Somuleiðis kunnu avlýsingar væntast hjá Bygdaleiðum kring landið mikudagin.

Veðrið hevur longu ávirkað siglingina í dag, týsdagin 13. oktober. Fyribils er eingin sigling millum Sand og Skúvoy.

Ferðafólk kunnu fylgja við dagførdu fráboðanunum á ssl.fo.