Talan er sambært íslendska forsætisráðnum um fyrstu ferð, at stjórnarleiðararnir í Føroyum, Íslandi og Grønlandi hittast serliga við tí endamáli at umrøða felags áhugamál hjá teimum trimum útnorðurlondunum.

Á skránni er millum annað støðan í Norðuratlantshavi og Arktis. Teir tríggir stjórnarleiðararnir skulu eisini vitja trygdarøkið á Keflavíkarflugvølli og hitta altjóða íleggjarar, sum hava áhuga fyri vinnu- og íløgumøguleikum í Útnorðri og á norðurslóðum.

Íslendska forsætisráðfrúan sigur, at londini hava serlig felags áhugamál í Norðuratlantshavi og Arktis, og at økið seinastu tíðina hevur fylt nógv í altjóða politikki. Hon vísir eisini á, at londini merkja tær trygdarpolitisku avbjóðingarnar í økinum og hava tørv á at samskifta tættari um tær.

Beinir Johannesen leggur sjálvur á Facebook dent á, at Føroyar, Grønland og Ísland hava nógv til felags.

– Eg haldi, at tað er umráðandi at hava góð sambond við hesar báðar grannarnar, tí bæði vinnuliga, menniskjaliga og politiskt deila vit søgu og landafrøði, skrivar løgmaður.

Hann nevnir eisini tað serliga sambandið millum føroyingar og íslendingar og sigur skemtandi, at føroyingar nærum altíð verða spurdir, um teir eru føroyingar, tá teir seta seg í ein hýruvogn í Íslandi.

Tað hendi eisini hjá løgmanni sjálvum, tá hann kom til Íslands í gjárkvøldið.

– Hugaligt, skrivar hann.

Fundurin kemur í eini tíð, har Norðuratlantshavið og Arktis hava fingið alsamt størri trygdarpolitiskan og vinnuligan týdning. Ísland hevði júst vitjan av amerikanska uttanríkisráðharranum, Marco Rubio, har trygd í Arktis og sterkari samstarv í Norðuratlantshavi vóru millum evnini.

Tíðindafundur við teimum trimum stjórnarleiðarunum verður klokkan 18 føroyska tíð.