Landsliðsmálverjin, Mattias H. Lamhauge, Sebastian Pingel og liðfelagarnir í Strømsgodset feira í kvøld, at Strømsgodset hevur tryggjað sær uppflyting til bestu norsku fótbóltsdeildina.

Leikararnir hjá Strømsgodset vóru savnaðir fyri at hyggja eftir dystinum millum Kongsvinger og Stabæk. Vann Stabæk dystin var uppflytingin staðfest hjá Strømsgodset. Endaði dysturin javnur hevði Strømsgodset verið trý stig frammanfyri Kongsvinger undan seinasta umfarinum. Harumframt hevði Strømsgodset havt ein málmun, ið var átta mál betri enn tann hjá Kongsvinger.

Tað gekk júst sum Mattias, Pingel og liðfelagarnir vónaðu. Stabæk vann 2-1 á Kongsvinger, hóast teir máttu spæla størra partin av seinna hálvleiki við einum leikara færri enn heimaliðið. Nicolai Ness var rikin av vøllinum í 66. minutti, men Stabæk megnaði at verja 2-1 leiðsluna heim.

Sambært Drammens Tidende grótu leikararnir hjá Strømsgodset av gleði, tá uppflytingin var staðfest við 2-1 sigrinum hjá Stabæk.

Undan seinasta leikumfarinum komandi sunnudag klokkan 12 er Haugesund fremst í deildini við 65 stigum. Strømsgodset hevur 63 stig, og Kongsvinger hevur 59 stig. Stabæk hevur 58 stig á fjórða plássinum.

Strømsgodset spælir seinasta dystin í hesum kappingarárinum á útivølli móti júst Stabæk, ið gjørdi teimum eina stóra tænastu í kvøld.