Nú vil hann hava at vita, um landsstýrismaðurin fer at skunda undir arbeiðið.

– Nógv tos, men fá ítøkilig úrslit.

Soleiðis byrjar Jenis av Rana, løgtingsmaður, viðmerkingarnar til ein skrivligan fyrispurning til Jacob Vestergaard, landsstýrismann í vinnumálum, um matvøruprísir.

Jenis av Rana vil hava at vita, um landsstýrismaðurin er nøgdur við tíðarætlanina fyri kanningina, sum skal finna grundleggjandi orsakirnar til høga príslagið á gerandisvørum í Føroyum. Hann spyr eisini, um landsstýrismaðurin ætlar at seta átøk í verk fyri at skunda undir kanningina, og hvørji hesi átøk í so fall verða.

Í viðmerkingunum vísir løgtingsmaðurin á, at prísirnir á mati, drekkivørum og øðrum gerandisvørum eru hækkaðir umleið 30 prosent seinastu fimm árini. Hann vísir millum annað til útsagnir hjá Kappingareftirlitinum í útvarpssendingini Breddanum 25. september.

Sambært Jenisi av Rana varð ein undankanning løgd fram í 2024. Hon varð ikki mett at vera nøktandi, men gav ábendingar, sum vóru orsøk til at fara undir eina størri kanning.

Henda kanningin er framvegis í gongd og fevnir millum annað um veitarar, smásølu og heilsølu. Hon skal kanna, um viðurskifti á føroyska marknaðinum forða fyri veruligari og virknari kapping.

Jenis av Rana undrast á, at arbeiðið tekur so drúgva tíð, samstundis sum gerandisvørurnar eru vorðnar munandi dýrari.

Hann skrivar, at eingin endalig freist er ásett, og at kanningin ikki verður liðug fyrr enn einaferð í 2027. Sambært honum varð í Breddanum víst á nógv arbeiði og eitt lítið kontór sum orsøkir til, at kanningin tekur tíð.

Løgtingsmaðurin heldur, at tørvur er á at finna orsakirnar til høgu prísirnar og møguligar loysnir, sum kunnu hjálpa vanliga borgaranum.