Ongar heimagjørdar spreingiløðingar vóru í vørubilunum, sum bretska løgreglan steðgaði við hernaðarflogstøðina Fairford tíðliga sunnudagin.

Løgreglan hevur tó lagt hald á eina nøgd av bensini úr bilunum. Tað upplýsir bretska yvirgangsløgreglan týsdag.

Málið verður kannað sum ein møgulig ætlan um álop á flogstøðina.

Fólk í økinum boðaðu løgregluni frá tíðliga sunnudagin, eftir at tey høvdu sæð illgrunasomu vørubilarnar.

Fairford liggur í útsynningspartinum av Onglandi. Amerikanskar herdeildir brúka flogstøðina til álop á Iran.

Fimm menn, sum vórðu handtiknir sunnudagin, vórðu mánadagin leyslatnir móti veðhaldi. Teir eru framvegis undir kanning.

Løgreglan leggur dent á, at avgerðin um at lata menninar leysar varð tikin við atliti at kanningararbeiðinum.

– Eg skilji, at henda gongdin kann hava komið óvart á nógv, sigur Laurence Taylor, leiðari fyri bretsku yvirgangsløgregluni.

– Men eg vil leggja dent á, at hetta var ein avgerð við atliti at kanningararbeiðinum, grundað á royndir og eina gjølliga meting av heimildunum hjá løgregluni.

Týsdag upplýsti løgreglan eisini, at húsarannsóknir eru gjørdar í London.

Kanningararbeiðið við sjálva flogstøðina verður nú minkað og væntast at verða liðugt mikudagin.

Ritzau