Fleiri ferðafólk geva størri umsetning og avlop hjá Københavns Lufthavne, sum rekur flogvallirnar í Keypmannahavn og Roskilde.
Roknskapurin, sum varð lagdur fram hósdagin, vísir ein umsetning upp á 4,5 milliardir krónur fyrstu níggju mánaðirnar. Tað er 8,7 prosent meira enn somu tíð í fjør.
Avlopið eftir skatt var 1,24 milliardir krónur, skrivar Ritzau.
Vøksturin kemur millum annað av, at flogfeløg hava stovnað nýggjar rutur og sett fleiri fráferðir inn á verandi rutum.
Serliga talið av ferðafólkum, sum skifta flogfar í Keypmannahavn, er vaksið. Har er vøksturin 24 prosent.
Stjórin, Christian Poulsen, sigur, at framgongdin gevur grundarlag fyri íløgum í flogvøllin og betri plássi til ferðafólkini.
Hann vísir tó á, at vøksturin er viknaður nakað seinastu mánaðirnar.
Keypmannahavnar Floghavn væntar framvegis umleið 34,5 milliónir ferðafólk í 2026, sum sostatt kann gerast eitt metár.
Ritzau
