Fyritøkan Box The Original tekur fleiri sjokulátuvørur við hindberjasmaki aftur. Orsøkin er fráboðanir frá viðskiftafólkum, sum eru vorðin sjúk við magatrupulleikum.

Tað upplýsir fyritøkan í einum tíðindaskrivi sambært Ritzau.

Afturtøkan fevnir um hindberjavørur við best-fyri-dagfesting millum 9. juli og 9. august 2027. Harumframt verða allir jólakalendarar hjá fyritøkuni tiknir aftur, uttan mun til dagfesting.

Millum vørunøvnini eru Raspberry, Dark Raspberry og Crunchy Raspberry.

Vørurnar eru seldar umvegis nethandil og serhandlar, millum annað Bahne. Viðskiftafólk, sum hava keypt beinleiðis í nethandlinum, hava fingið boð.

Tey, sum hava keypt vørurnar í vanligum handlum, verða biðin um at lata tær aftur har, tær eru keyptar, og fáa peningin aftur.

Fyritøkan hevur sett seg í samband við danska Fødevarestyrelsen og veitaran av hindberjapulvuri fyri at finna orsøkina.

Ritzau