Leygardagin hin 17. oktober klokkan 16, sum er í morgin, verður høvi at hoyra Eyða Horsdal saman við vælspælandi bólki aftrat sær í Funnings kirkju.

- Eyði og bólkurin fyrireika spennandi heildarútgávu við egnum tilfari. Talan er um nýggjar sangir á føroyskum í fólksligum sangbærum stíli.

Á heimasíðuni hjá Runavíkar kommunu verður víst á, at Eyði hevur eyðmerkt seg við einum løttum melodiskum tóna og jarðbundnum sansaligum tekstum.

- Sangirnir eru bæði lættir og hugnaligir, eins og teir rúma dýpd og álvarsemi. Lagt er upp til eina serstaka, nærverandi og ikki minst hugnaliga konsert.

Tónleikarar eru: Eyði Horsdal (sang, guitar og klaver), Kristian Pauli Ellefsen (orgul og harmoniku), Arnold Ludvig (bass og guitar), Kristian Blak (klaver) og Albert Karch (trummur og orgul).

- Konsertin í Funnings kirkju seinnapartin í morgin er ókeypis og partur av Økistónum, verður lagt aftrat.