Í einum skrivligum fyrispurningi til Eyðdis Hartmann Niclasen, landsstýriskvinnu í heilsumálum, spyr Ruth Vang, um ætlanir eru um at víðka skipanina niður til 45 ár ella møguliga 40 ár.

Hon vil eisini hava at vita, um Sjúkrahúsverkið hevur neyðugu orkuna og tilfeingið til eina slíka broyting, og hvat tað hevði kostað.

Ruth Vang vísir á, at oktober er altjóða bróstkrabbamánaður, og at Krabbameinsfelagið í hesum sambandi varpar ljós á týdningin av arbeiðinum móti bróstkrabba.

Sambært viðmerkingunum til fyrispurningin verður umleið tíggjunda hvør kvinna í Føroyum rakt av bróstkrabba.

Ísland og Svøríki hava víðkað skipanina

Í Føroyum hava kvinnur í aldrinum 50 til 69 ár í nøkur ár fingið bjóðað mammografikanning annaðhvørt ár.

Ruth Vang vísir á, at líknandi skipanir eru í hinum Norðurlondunum, men at Ísland og Svøríki hava víðkað aldursbólkin, so kvinnur í aldrinum 40 til 74 ár fáa tilboð um kanning.

Hon skrivar eisini, at fakfólk ikki eru á einum máli um rætta aldursmarkið, men at vísindaligar kanningar geva ábendingar um, at tað kann geva úrslit at bjóða kanning til kvinnur undir 50 ár.

Spyr um kostnað og tíðarætlan

Ruth Vang spyr landsstýriskvinnuna fýra ítøkiligar spurningar: Um aldursbólkurin skal víðkast, um Sjúkrahúsverkið hevur orkuna til tað, hvat tað hevði kostað, og nær ein møgulig broyting kann verða sett í verk.