Nógv løgreglufólk eru farin til Keypmannahavnar í sambandi við vitjanina hjá ukrainska forsetanum, Volodymyr Zelenskyj. Hann kemur til Danmarkar at hitta stjórnarleiðarar úr Norðurlondum.

Trygdaruppgávan er so stór, at løgreglan í Keypmannahavn ikki megnar hana einsamøll.

– Talan er um eitt átak, sum er so stórt og krevur so nógv fólk og tilfeingi, at løgreglan í Keypmannahavn ikki kann taka sær av tí einsamøll, sigur Peter Dahl, leiðandi politiinspektørur hjá løgregluni í Keypmannahavn, við Ritzau.

Danmark hevur 12 landafrøðilig løgregludømi. Sambært Peter Dahl fær løgreglan í høvuðsstaðnum hjálp frá øllum uttan einum ella tveimum teirra.

Løgreglan er eisini í tøttum samskifti við donsku fregnartænastuna PET um vitjanina og møguligar hóttanir. Við støði í hesum verða trygdartiltøk sett í verk.

– Tað er greitt, at við einari vitjan av hesum slagnum eru vit rættiliga ovarlaga á trygdarstiganum, sigur Peter Dahl við Ritzau.