Í kvøld klokkan 20 verður konsert við Marius Ziska við bólki í Løkshøll í Runavík. Eisini fer Lea Eyðbjørg at hita upp til Marius.
- Marius Ziska hevur saman við bólki sínum verið eitt av Føroya fremstu tónleikanøvnum í mong ár. Kensluborni tónleikurin hevur veruliga fingið fastatøkur á áhoyrarunum.
Lagt verður aftrat, at við síni vøkru og vælklingandi rødd og framúr góðum sangum sum Nærveran, Villingarsjónin og Ongin megnar Marius veruliga at røra og rúnarbinda fjøldina.
- Bólkurin hevur vunnið nakrar Faroese Music Awards virðislønir, eitt nú “Ársins lag 2022”.
Í 2023 varð RÚM givin út, sum gav tónleikinum ein meira elektroniskan dám og lat føroysku melankoliina í ein nýggjan og lættari búnað.
- Hóast nógvir sangir longu eru fólkaogn, og hetta veruliga varð staðfest í samband við útseldu konsertirnar saman við Føroya Symfoniorkestri, so heldur Marius fram við at royna nýggjar leiðir.
Lagt verður aftrat, at í løtuni arbeiðir hann við einari nýggjari útgávu, har hann fer at syngja á enskum, eins og hann partvís gjørdi á gjøgnumbrotsútgávuni HOME frá 2015.
- Á konsertini í Løkshøll sleppa vit at hoyra nakrar av nýggju sangunum frá útgávuni, sum er ávegis.
Føroysk/ danska songkvinnan og sangskrivarin, Lea Eyðbjørg, fer at hita upp til Marius.
- Hon hevur staðfest seg sum eina av teimum mest spennandi røddunum á norðurlendska tónleikapallinum.
At enda verður sagt í tíðindaskrivi, at við einari sjáldsamari samanrenning av sárbæri og styrki hevur hon skapt sítt egna ljóðunivers við sorgblíðum, men fangandi poppløgum.
