Í fjør var tað í UEFA Conference League, og tað verður roknað at vera óført, um tað í ár fer at eydnast at endurtaka ta bragdið.
Í kvøld var KÍ í Malmø, og har endaði tað í europeisku meistarakappingini við 4-1 heimasigri. Leikliga avrikið í kvøld vísti, at tað ikki er óhugsandi, at KÍ um eina viku heima í Klaksvík fer at megna tepran sigur ella kanska javnleik. Men tað er ov bjartskygd at rokna við møguleikanum, at Malmø FF fer at missa trivaligu leiðsluna soleiðis, at KÍ fer at vinna við í hvussu so er trimum málum.
Í kvøld var leikliga avrikið hjá trífalda meistaraliðnum úr Klaksvík meiri sannførandi, enn tað var í fyrsta umfari ímóti luksemborgska meistaraliðnum, sum KÍ samantalt vann 2-0 ímóti. Veruleikin er, at mótstøðuliðið í kvøld var væl stinnari, enn tað var í fyrsta umfari.
Odmar Færø var ein av trimum miðverjum, og Claes Philip Kronberg varð valdur at røkja vongverjan í vinstru í 5-4-1 uppstilling.
Heimaliðið vann fyrra hálvleik 3-0. Teir í KÍ leguni eiga at iðra seg um øll málini, sum stóðust av støðum, har KÍ misti á uppspæli ella mistøk vóru gjørd í verjuni. Soleiðis var tað eisini í seinna hálvleiki, tá ið Malmø staðfesti 4-1 sigurin. Tá var talan um hornaspark og útfrá aftur, og so datt bólturin fyri føturnar á heimamanni, sum hevði fleiri myrkabláar kring seg.
Serliga fyrsta korterið eftir steðgin var heimatrýstið øgiligt. Tá vísti KÍ liðið seg frá síni bestu síðu. Verjuspælið var væl skipað frá Páll A. Klettskarð í fremstu ódnini og aftur til málverjan, sum onkra ferðina bjargaði heilt væl, eftir at hann í onkrum av støðunum, sum í fyrra hálvleiki bóru mál við sær, ikki sá so sannførandi út.
Í seinna hálvleiki spældi KÍ seg til onkrar støður, og sum tíðin leið eydnaðist tað í løtum at varðveita bóltin.
Í 71. minutti eydnaðist tað at minka um munin til 3-1. Jóannes K. Danielsen átti uppleggið til Árna Frederiksberg, sum var leysur, tá ið hann eitt vet til høgru í brotsteiginum var púra kaldur, tá ið hann setti bóltin millum beinini á málverjanum.
Hetta var níggjunda málið hjá Árna Frederiksberg í Champions League, og at leiðslan var 3-1 bar við sær kenslu av, at tað kanska fór at eydnast hjá KÍ á heimavølli at venda gongdini og verða samantaldur vinnari.
Men so var tað fimm minuttir undan leikloki, at Malmø FF økti um leiðsluna til 4-1.
Møguleikin fyri bólkaspæli í Champions League er lítil ella rættari eingin hjá KÍ. Spurningurin er, um tað fer at eydnast meistarunum at vinna seg í Europa League ella tað aftur verður UEFA Conference League.
Leikliga avrikið í kvøld bendi á, at tað er møguleiki fyri tí. Tað gongur rætta vegin hjá liðnum, og skiftingarnar í kvøld undirstrikaðu, at tað av álvara er kapping um plássini á vøllinum.
Malmø FF- KÍ 4-1 (3-0)
Champions League 2. umfar fyrri dystur
Týsdagin 23. juli 2024 kl. 18.00 á Eleda leikvøllinum í Malmø
1-0: Lasse Berg Johnsen 21.
2-0: Hugo Bolin 37.
3-0: Lasse Berg Johnsen 43.
3-1: Árni Frederiksberg 71.
4-1: Søren Rieks 85.
Dómarakvartett úr Sveis: Lukas Fähndrich, Guillaume Maire, Nicolas Müller og Nico Gianforte (4. dómari)
KÍ: Mark F. Jensen – Jóannes K. Danielsen, Céderic Yambéré, Odmar Færø (Børge Petersen, 68.), Alexander Berntsson, Claes Philip Kronberg (Patrick Da Silva, 69.) – Árni Frederiksberg, René Shaki Joensen (Deni Pavlovic, 56.), Albert Ejupi (Pætur J. Petersen, 82.), Kristoffer Ødemarksbakken – Páll A. Klettskarð (Joseph Michael Williams, 56.)
Á beinkinum uttan at verða skiftir inn: Ari í Haraldstovu Petersen, Dan í Soylu, Heini Vatnsdal, Ahmed Latif
Gult kort: Deni Pavlovic, Jóannes K. Danielsen, Albert Ejupi, Céderic Yambéré
Venjari: Espen Haug
