Liðini hjá Martini Agnarssyni, Áka D. Samuelsen og Mattiasi Hellisdal, Mjällby og Västerås leiktu í kvøld næstseinastu dystirnar í bestu svensku fótbóltsdeildini, Allsvenskuni.
Á útivølli megnaði Mjällby javnleik 1-1 móti Malmö FF. Martin var á vøllinum allan dystin, og Áki kom á vøllin stutt fyri steðgin, tá Jacob Bergstöm gjørdist skaddur.
Tá farið var um fyrsta hálva tíman legði Villiam Granath Mjällby á odda 1-0. Í 63. minutti javnaði heimaliðið til 1-1.
Mjällby er nummar 12 í deildini við 29 stigum.
Nú skulu Martin, Áki og liðfelagarnir á eina langa ferð, ið Martin og Áki kenna væl, nevnliga til Kasakstan. Hósdagin klokkan 15.30 spælir Mjällby dyst móti Kairat í deildarspælinum í Conference League. Tríggjar dagar seinni endar Mjällby svensku kappingina við dysti á útivølli móti Halmstad.
Mattias var á vøllinum í 73 minuttir, tá Västerås á Gamla Ullevi leikvøllinum í Göteborg tapti 1-3 fyri GAIS.
GAIS legði seg á odda longu aftaná 10 minuttirs spæl. Men bert níggju minuttir seinni javnaði Jens Magnusson fyri Västerås. Stutt áðrenn Mattias fór av vøllinum legði heimaliðið seg á odda 2-1, og móti dystarenda øktu teir til 3-1.
Västerås er nummar seks í deildini við 45 stigum, ið er sera flott fyri ein uppflytara.
Västerås endar kappingarárið á heimavølli 29. november. Tá fáa teir vitjan av Hammarby, ið er í harðari kapprenning við Sirius Uppsala at vinna svenska meistaraheitið. Västerås kann sostatt vera við til at senda meistaraheitið til Uppsala, um úrslitini laga seg.