Tað vakti ans, tá amerikanski forsetin, Donald Trump, hósdagin heilsaði upp á russiska forsetan, Vladimir Putin, á APEC-toppfundinum í Kina og rópti:
- Hvør er hann? Hann er mín vinmaður, áðrenn hann teskaði russiska forsetanum, Vladimir Putin, okkurt í oyrað.
Á einum tíðindafundi í Berlin sama dag ypti ukrainski forsetin, Volodymyr Zelenskyj, bert øksl og tagdi, tá hann varð spurdur um útsøgnina.
Men í nátt tók hann blaðið frá munninum í einari samrøðu við CNN.
– Fyri okkum er hann ein drápsmaður. Hann drepur bæði dag og nátt, sigur Volodymyr Zelenskyj um russiska forsetan, Vladimir Putin.
Sambært Verdens Gang stúrir ukrainski forsetin fyri, at vinaligu orðini hjá Donald Trump kunnu gera, at russiski forsetin ikki kennir nóg stórt trýst til at steðga krígnum í Ukraina.

Samstundis vísir Volodymyr Zelenskyj á, at Ukraina seinasta samdøgrið hevur verið fyri nøkrum av harðastu russisku álopunum í ár, har í minsta lagi níggju sivilfólk hava latið lív.
Hóast vónbrotið um orðini hjá Trump, heldur Zelenskyj tó fast við, at USA framvegis er týdningarmesti semingsparturin fyri at fáa ein enda á krígnum.